دوّن دوّن,,,, ربك يهوّن

الحمدلله رب العالمين و الصلاة و السلام على أشرف المرسلين سيدنا محمد و على آله و صحبه اجمعين,,

العبدلله من زمان مستهوياني فكرة كتابة المدونات دي,,, لكن ما حصل لي الشرف و كتبتا واحدة… لكن أمس لقيت في الفيس بوك إعلان لي دورة عن التدوين الألكتروني حيقدمها م محمد النعمان و اللي هو واحد من الشباب الأفذاذ …ما تقولوا ده كسير تلج نظام هو الحيقدم الدورة و كده.. لكن بالجد هو واحد من مجموعة شباب انا أحترمهم و أقدرهم جداً جداً جداً… تحديدا كده الشباب بتاعين خرطوم قيقز.. و بالجد الشباب ديل بذكروني الأثر الفيهو أنو سئل سيدنا العباس بن عبدالمطلب عم الرسول صلى الله عليه و سلم هل اكبر هو ام الرسول صلى الله عليه و سلم… و هو في السن اكبر من الرسول صلى الله عليه و سلم.. فجاوب… هو أكبر مني.. ولكني ولدتُ قبله…

فهسا الشباب ديل… انا ولدتُ قبلهم 🙂

ففي الفورم بتاع التقديم للدورة.. كان في سؤال .. هل تملك مدونة… صراحة اترددتا .. انا عندي مدونتي دي قديييييمة .. لكن للأسف فاااااااااااااضية .. مافيها ولا موضوع… بدليل إنو ده اول موضوع و كده .. المهم إتوكلتا و لصقتا العنوان بتاع مدونتي ده … و إن شاءالله حيكون ده دافع لي أني اواصل في الكتابة إلى ما شاءالله …

زي ما قلتا قبيل أنو من زمان عندي الفكرة في الكتابة… و تحديداً كده عندي فكرة سلسلة إسمها “جحر الضب”…

موضوعها الأساسي مستوحي من الأثر الوارد عن الرسول صلى الله عليه و سلم اللي قال فيهو :” لتتبعن سنن من كان قبلكم شبراً بشبر و ذراعاً بذراع حتو و لو دخلوا جحر ضبٍ لدخلتموه فساله الصحابة : اليهود و النصاري؟ قال: فمن؟ أو كما قال

كتير كتير من الحاجات في مجتمعنا ماهي إلا جحر الضب ده زااااتو القاصدو الرسول صلى الله عليه و سلم.. اتباع أعمي لليهود و النصارى.. في البيت في الشارع في الجامعة في الشغل في العرس و تاني في البيت و و و… . ح احاول إن شاءالله كل ما تجيني خاطرة متعلقة بالموضوع ده أكتب عنها في السلسلة دي.

بالنسبة لي عنوان البوست ده… قبيل في الشغل بوري في الشباب انو في دورة في التدوين و كده… واحد قال لي تدوين شنو؟ آر بي جي ولا شنو ^_^… فجا في بالي العنوان ده